Risatónleikar XXX Rottweilerhunda í Laugardalshöll 17. maí

Risatónleikar XXX Rottweilerhunda í Laugardalshöll 17. maí 

XXX Rottweilerhundar, stærsta rapphljómsveit íslenskrar tónlistarsögu og textagerðar, heldur risatónleika í Laugardalshöll föstudaginn 17. maí n.k. í samstarfi við Víking Léttöl

XXX Rottweiler þarf vart að kynna fyrir þjóðinni. Hljómsveitin kom fyrst saman árið 1999 en skaust svo upp á stjörnuhimininn í mars árið 2000 þegar sveitin vann Músíktilraunir. Þegar síðan samnefnd platínuplata hljómsveitarinnar kom út undir lok árs 2001 varð sprenging sem ekki sér fyrir endann á.

Rottweilerhundar eru brautryðjendur íslenskrar rappsenu og í kjölfar þeirra fylgdi ótal tónlistarmanna sem gáfu út rapp á íslensku. Seinni plata Rottweiler kom út árið 2002 en undanfarin ár hefur hljómsveitin gefið út lög með reglulegu millibili sem öll hafa notið mikilla vinsælda.

„Það stóð alltaf til að fagna 20 ára afmælinu með stórum tónleikum en heimsfaraldurinn kom í veg fyrir það. Þess í stað ætlum við að keyra á þetta núna þar sem við nálgumst 25 ára aldurinn, xxxR og meðlimir, við erum allir alltaf 25 ára“ segir Erpur Eyvindarson, BlazRoca, um tónleikana.

Landslið tónlistarmanna hefur í gegnum tíðina komið við sögu í lögum Rottweilerhunda og stendur til að fá mikið af góðum gestum á tónleikana til að gera þá sem glæsilegasta og segja sögu þessarar stórmerku hljómsveit.

„Það er alveg óhætt að lofa rosalegri sýningu, stemningin sem myndast á tónleikum okkar hefur alltaf verið bandbrjáluð. Við erum svo fáránlega æstir í að leggja allt okkar í hvert einasta smáatriði, fyrir fulla Laugardalshöll af okkar yfirburða aðdáendum“ segir Ágúst Bent Sigbertsson, Bent, um tónleikana.

Húsið opnar kl. 18:00 og tónleikarnir hefjast kl. 20:00.

Aldurstakmark er 18 ára

VIP Miðar

XXXR Betri Stofan gerir yfirburða vel við glæsi gesti á 25 ára afmælishátíð xxxR. Fyrir aukabúnt af bleðli geta leikmenn skilið veskið eftir á Kjalarnesi og baðað sig í fersku flæði af flóuðu fíneríi á besta kvöldi lífs síns.

Príma aðstaða og aðgengi:
Sérstök VIP aðkoma í Laugardalshöll og aðgangur að xxxR Leikmannastúkunni, VIP svæði með einkasvölum og óheftu utsýni á tónleikana trylltu.

Fancy fóður og fínerí:
Úrval af veislumat og dýrindis dýrategundum framreiddum af fagfólki sem kallar ekkert ömmu sína í gourmet. Vegan veislugrísir munu einnig hoppa hæð sína í fullum hörklæðum og þeysa um á bragðlauk.

Gullnir dropar á gleðistund:
Sælusalurinn verður innréttaður kringum botnlausan bar af veisluveigum og gæðaglussa. Geðþekkir barþjónar til í trúnó og rað-afgreiðslur af öl-úrvali og langdrykkjum, áfengum og óáfengum. Skál svo mikið.

Sumargjöf xxxRottweiler:
Sérstakur 25 ára afmælissekkur xxxRottweiler verður barmafullur af árituðum glaðning sem uppfyllir alla drauma hvers unnenda íslensku rapphetjanna jafnt sem útsjónarsamra safnara. Þónokkrir heppnir munu eignast persónulega muni xxxRottweiler sem hafa brugðið fyrir í leik og starfi Rapphundanna.


Félagsskapur úr efri hillunum:
XXXRottweilerhundar munu að sjálfsögðu heilsa upp á mannskap og kýla í sig einum göróttum með gestum Betri stofunnar.

Kynlífsgreiðar:
Nei nei, enda verður samlíf nú bara að hafa sinn náttúrulega gang.

Romm-rúsínan í pulsuendanum:
Aðgangur og fram fyrir röð í eftirpartýið ógurlega. Segi ekki meir. Ekki múkk um það meir.

Miðinn gildir fyrir einn