Tóti trúbador í Kómedíuleikhúsinu

Tóti trúbador, Bílddælingurinn Þórarinn Hannesson, mætir í hið sígræna Kómedíuleikhús í Haukadal með einstaka og tvískipta tónleikaupplifun.

Í fyrri hluta kvöldsins flytur Tóti eigin lög við texta eftir ýmis skáld, þar sem gestir fá að njóta tónlistar úr ríkulegum lagasjóði hans. Í seinni hlutanum verða áheyrendur sjálfir í aðalhlutverki þegar Tóti leiðir sprellfjörugan fjöldasöng með lögum sem allir þekkja.

Tóti á að baki tæplega 50 ára feril í tónlist, bæði sem söngvaskáld og meðlimur í fjölda hljómsveita. Þá hefur hann starfað með sönghópum, kvæðamannafélögum og kórum og komið fram með gítarinn við ótal tækifæri víða um land.

Á árunum 2001 til 2014 gaf Tóti út fimm geisladiska með frumsömdu efni og munu lög af þeim hljóma í fyrri hluta tónleikanna, ásamt nýju efni. Eftir gott hlé verður síðan blásið til kraftmikils samsöngs þar sem markmiðið er einfalt, að lyfta þakinu af húsinu!

Komdu og njóttu hlýrrar, skemmtilegrar og lifandi tónleikastundar í Kómedíuleikhúsinu.